Komunikadu Imprensa
Canberra, 31 Maiu, 2023
 |
| Doc: SEFOPE |
AUSTRALIA ASEITA KARIMBU EXTENSAUN BA PASSAPORTE TIMOR-LESTE
Embaixadora Timor-Leste ba Austrália, Sra. Inês Almeida, ohin simu ho haksolok desijaun Governu Australia nian ba aseita karimbu extensaun ba passaporte eletróniku ne’ebe mak imiti husi Governu Timor-Leste ba situasaun ne’ebe konsidera espesiál.
Embaixadora Inês hateten, Austrália permiti ona ba passaporte TL ne’ebe mate, maibe bele hetan karimbu ba data extensaun tuir Dekretu Lei Governu Timor-Leste No. 23/2023, loron 19 April 2023.
Embaixadora Inês hatutan” rekonhesimentu husi Governu Austrália ba karimbu extensaun ba passaporte elektróniku ne’ebe mak emiti husi Governu Timor-Leste ba Trabalhadór Timoroan sira ne’ebe mak atu halo viajen mai Austrália tuir misaun serbisu liu husi programa Mobilidadi Laborál Pasifiku Austrália (MLPA) ne’e permiti atu Empregadór akreditadu sira iha programa (MLPA) iha tempu badak ba rekruta tan ita nia trabalhadoris”.
“Timor-Leste hetan ona fama diak iha nia partisipasaun ba programa mobilidadi laborál iha Austrália liu husi trabalhadóris ne’ebe mak serbisu iha sektór agrikola, peska, órtikultura, óspitalidadi no industria prosesamentu na’an.”
“Sira foo kontribuisaun bo’ot teb-tebes ba ekonomia rai rua nian.” Embaixadora hatutan liu tan rejolusaun ba aplika karimbu extensaun ba passaport ne’ebe mate sei simu ho laran luak husi Empregadór Akreditadu sira ne’ebe mak ansi los atu lori tan trabalhadór Timoroan mai Austrália, tamba ita nia trabalhadór sira hetan fama diak ona hanesan trabalhador ne’ebe badinas, pronto atu aprende, repeitoju no amigavél.
Embaixadora hato agradesimentu ba Governu Austrália ba nia prontidaun ba buka hetan solusaun ba assuntu passaporte mate ne’e reflete relasaun vijihansa pojitiva entre Austrália no Timor-Leste. FIM