Dili, 03 Outubru 2022: Ministériu Obras Públikas (MOP) lamenta ho konta Facebook balun ne’ebé politiza tiha informasaun husi média Suara Timor Lorosa'e (STL) ho títulu: "MOP Garante Rehabilitasaun Estrada Laga-Baguia, Sei Implementa Tinan ne'e" ne'ebé publika iha sítiu stlnews.co muda tiha títulu ba "MOP Garante Rehabiliþasaun Estrada Laga-Baguia adia ba Fulan Dezembro 2022." ne'ebé publika iha nia konta Facebook iha loron 02 fulan-Outubru 2022.
Atu labele konfundi no politiza interese povu nian, Ministériu Obras Públikas hakarakk klarifika no esplika ho detallu prosesu tomak kona-ba projetu rehabilitasaun foun estrada munisipál Laga-Baguia, no Uaiaka-Kelikai to'o parte balun husi Ossu nian. Esforsu hirak ne’ebé durante ne’e Ministériu Obras Públikas lidera husi Ministru, Eng. Abel Pires da Silva, halo mak ho prosesu sira hanesan tuir mai:
1. Konsellu Ministru delibera hodi fó autoriza loke tenderizasaun ba projetu estrada Uaiaka-Kalikai-Ossu iha loron 4 fulan-Maiu tinan 2022 (Bele haree Link: http://timor-leste.gov.tl/?p=30523&lang=tp ) no ba Laga-Baguua iha loron 13 fulan-Maiu tinan 2022 (Haree iha Link: http://timor-leste.gov.tl/?p=30572&lang=tp). Prosesu tenderizasaun ne'e hala'o husi Komisaun Nasionál Aprovizionamentu (CNA, sígla Portugués).
2. Hafoin hetan tiha autorizasaun husi Konsellu Ministru, CNA loke prosedimentu aprovizionamentu nian tipu Konkursu Públiku Internasionál, ba adjudikasaun kontratu ba reabilitasaun estrada munisipál rua ne’e. Ba projetu estrada Uaiaka-Kalikai-Ossu tenderizasaun CNA hahú loke iha loron 24 fulan-Maiu tinan 2022 no ba estrada Laga-Baguia hahú iha loron 27 fulan-Maiu tinan 2022.
3. Hafoin CNA loke tenderizasaun no hetan tiha manán na'in, MOP hanesan projetu nain aprezenta hikas ba Konsellu Ministru tanba projetu rua ne'e nia kustu liu millaun $5. Iha loron 14 fulan-Setembru 2022, Konsellu Ministru autoriza ajudikasaun kontratu públiku ba rehabilitasaun estrada seksaun husi Laga ba Baguia - Pakote IV estrada munisipal sira - ; no seksaun husi Uaiaka-Kelikai ba Ossu- Pakote III estrada munisipal sira. Bele haree iha link: http://timor-leste.gov.tl/?p=31197&lang=tp ou https://m.facebook.com/story.php?story_fbid=151716487496627&id=100079748300226
4. Hafoin hetan autorizasaun husi Konsellu Ministru, sei presiza tan prosesu ida importante no ikus liu mak hetan vístu husi Kámara de Kontas antes ba prosesu implementasaun fíziku ka lansamentu ba projetu estrada rua ne'e.
Tanba ne'e, Ministru Obras Públikas, Eng. Abel Pires da Silva, nia intervensaun sira ikus-ikus ne'e ba projetu rua ne'e mak hein prosesu ida ikus liu mak hetan vístu husi Kámara de Kontas, bainhira Kámara de Kontas fó ona vístu mak sei halo esforsu para halo lansamentu iha semana ida nia-laran. Bele rona informasaun kompletu iha video link fb: https://fb.watch/fVtwHfvKSo/
Ekipa tékniku interministeriál halo ona identifikasaun ba komunidade afeitadu sira husi projetu rua ne'e, no daudauk ne'e públika ona dadus hirak ne'e iha suku sira relevante atu komunidade afeitadu bele halo konfirmasaun antes Governu fó indiminizasaun no implementa projetu rua ne'e bainhira hetan ona vístu husi Kámara de Kontas.
Espera husi publikasaun informasaun badak ne’e bele fó hanoin hikas públiku liuliu ba komunidade Laga-Baguia, Uaiaka-Kelikai-Ossu ne’ebé durante ne’e preokupa no halerik ba kondisaun estrada katak, VIII Governu Konstitusionál ne’ebé lidera husi S. Exa, Primeiru Ministru (PM), Jenerál Taur Matan Ruak, halo esforsu tomak oinsá hadi’a infraestrutura bázika sira hodi fasilita movimentasaun komunidade nian liga entre área urbana no rurál, inklui estrada Laga-Baguia, Uaiaka-Kelikai-Ossu no projetu estrada iha munisípiu seluk.
Nune’e husu nafatin publik atu akompaña informasaun sira kona-ba projetu estrada Laga-Bguia no Uaiaka-Kelikai-Ossu ne’ebé nia link publika daudauk ne’e atu nune’e labele habosok públiku no publika informasaun ne’ebé la ho faktus iha media sosiál.
Povu Maubere Sita Husi # Media_MOP#